Ձեր վստահելի աղբյուրը

Panorama.am-ի հարցազրույցը Եվրոպայի խորհրդի խորհրդարանական վեհաժողովում ՀՀ պատվիրակության ղեկավար, ՀՀ Ազգային ժողովի փոխնախագահ Հերմինե Նաղդալյանի հետ՝ կապված բրիտանացի պատգամավոր Ռոբերտ Ուոլտերի հայտնի հակահայկական զեկույցի հետ։

-Տիկին Նաղդալյան, այսօր ԵԽԽՎ քաղաքական կոմիտեի օրակարգում էր նաև Լեռնային Ղարաբաղի հարցով զեկուցող Ռոբերտ Ուոլտերի հայտարարությունը։ Ի՞նչ էր իրենից ներկայացնում այդ հայտարարությունը և որն էր զեկուցողի՝ վաղաժամ հայտարարություն անելու նպատակը։

-1 տարի է բրիտանացի  Ուոլտերը աշխատանքներ է կատարում զեկույցը պատրաստելու համար, լավ հասկանալով հանդերձ, որ որքան էլ ցանկանա, չի կարող զեկույցում ներկայացնել միայն ադրբեջանական կողմին հաճելի մտքերն ու դիրքորոշումները։ Զեկույցը միակողմանի լինելու դեպքում խիստ հարցեր է առաջացնելու և զեկույցի լեգետիմությունը ցածր է լինելու։ Չնայած զեկուցողի խորհրդարանական ժամկետն ավարտվել է, իսկ վեհաժողովային ժամկետին ընդամենը 1 ամիս  է մնացել, այնուամենայնիվ, նա աշխատում է ձև գտնել և ներկայացնել զեկույցի թեկուզ նախագիծը, այսինքն գոնե իրենից հետո թողնի իր ժառանգությունը և նաև արդարանա զեկույցի «նախաձեռնողների»  մոտ, որ կատարել է իր հանձնարարությունը։

-Եվ ի՞նչ ներկայացրեց զեկուցողը հանձնաժողովում։

- Ռոբերտ Ուոլտերն այս մեկ տարվա ընթացքում, ինչ նշանակվել է զեկուցող, 2 անգամ փաստահավաք առաքելություն է կատարել Ադրբեջան։ Ըստ կանոնակարգի,  զեկուցողներն իրենց փաստահավաք այցերի մասին պետք է ներկայացնեն տեղեկատվություն։ Եվ այսօր զեկուցողը ներկայացնում էր, թե այցի ընթացքում ինչ է արել և ում հետ է հանդիպել։  Ուոլտերը, որքան էլ չէր ցանկանում ուղղակի կապի մեջ մտնել Լեռնային Ղարաբաղի հետ, վերջապես դիմել է ԼՂ իշխանություններին՝ այնտեղ ևս փաստահավաք այցով լինելու համար, քանի որ զեկույցի պատրաստման  համար դա պարտադիր է։ Սակայն Ուոլտերը  ձգտում էր շրջանցել և աշխատում էր խուսափել ԼՂ իշխանություններին ուղղակիորեն դիմելուց։ Տեսնելով, որ այլ կերպ չի ստացվում, պարոն Ուոլտերը վերջապես դիմել է ԼՂ իշխանություններին։

-Իսկ Լեռնային Ղարաբաղ զեկուցողի այցը ե՞րբ է նախատեսվում։

-Այցի վերաբերյալ դեռևս որոշակիություն  չկա։ ԼՂՀ իշխանություները պատասխանել են, որ ստացել են նամակը, քննարկում են և կպատասխանեն։ Այսօր ևս զեկուցողը, ընտրողաբար ներկայացնելով տեղեկատվությունը, չնշեց, որ այս մեկ տարվա  ընթացքում ցանկություն չի ունեցել դիմել ԼՂ իշխանություններին։ Հանձնաժողովի նիստի ժամանակ ես և Արմեն Ռուստամյանը հանձնաժողովի անդամների ուշադրությունը հրավիրցինք այն փաստերին ու  խեղաթյուրումներին, որոնք առկա էին զեկուցողի ելույթում։ Ներկայացրեցինք իրականությունը, ինչը, իհարկե, դուր չեկավ  ադրբեջանամետ պատվիրակներին և Ադրբեջանի ներկայացուցիչներին։

-Ինչպես ասացիք, պարոն Ուոլտերի վեհաժողովում լինելու մանդատի ավարտին մնացել է 1 ամիս, ի՞նչ է լինելու զեկույցի ճակատագիրը, եթե զեկուցողը չհասցնի այն պատրաստել։

- Մենք առիթ ունեցել ենք ասելու  որ, մեր խորին համոզմամբ, այդ զեկույցը վաղուց արդեն պատրաստ է և պատվիրատուներն  իրենք էլ հենց պատրաստել են այն, որի տակ միայն  կդրվի պարոն Ուոլտերի ստորագրությունն ու կներկայացվի։ Այսօր քննարկման ժամանակ Ադրբեջանի պատվիրակության ղեկավարը   անհավասարակշիռ  վիճակի մեջ հայտնվելով լեզվի սայթաքում թույլ տվեց՝ ասելով, որ «կա զեկույցը, կա զեկուցողը» և իրենց էլ ոչինչ չի մնացել անելու, սակայն անհասկանալի ձևով իրենց խանգարում են՝ գործն ավարտին հասցնել։

Սակայն որպես կանոն, նման դեպքերում, երբ զեկույցները կիսատ են մնում տարբեր պատճառներով, ինչը հաճախ է տեղի ունենում, նոր զեկուցող է նշանակվում։ Կախված նաև զեկուցողից և այն փաստից, թե զեկույցի պատրաստումը որ փուլում է գտնվում, նոր զեկուցողը որուշում է  փոփոխություններր կատարել զեկույցի եղած նախագծում  և  կամ շարունակել։

Դեռևս ժամանակ կա, և նոյեմբերի 4-ին մենք ունենք ևս մեկ հանձնաժողովի նիստ, որի ժամանակ   զարգացումները  կերևան։

Նշենք, որ բրիտանացի պատգամավորի զեկույցը վերնագրված է «Լեռնային Ղարաբաղում և Ադրբեջանի մյուս գրավյալ տարածքներում բռնությունների աճ»:

Աննա Մկրտչյան, Ստրասբուրգ

 Նախորդող`
Հակահայկական զեկույցի հեղինակ Ուոլթերը ԼՂՀ իշխանություններից Արցախ այցելելու թույլտվություն է խնդրել
Բացառիկ. ՀՀ պատվիրակությունը բոյկոտում է ԵԽԽՎ-ում ԼՂ զեկույցի պատրաստման գործընթացը
ԵԽԽՎ-ում հայկական պատվիրակությունը անհամաձայնություն հայտնեց Լեռնային Ղարաբաղի վերաբերյալ զեկույց պատրաստելուն
Լեռնային Ղարաբաղի հարցով ԵԽԽՎ զեկուցողը փաստահավաք այցով մեկնում է Ադրբեջան